ကျမ်းစာက ဤသို့ပြောသည်။ “တဖန်ဘုရားသခင်က အသက်ရှင်၍ လှုပ်ရှားတတ်သော တိရစ္ဆာန်တို့ကို ရေသည်များပြားစွာ မွေးဖွားစေ။ ငှက်တို့လည်း မြေပေါ် မိုဃ်းကောင်းကင်မျက်နှာကြက်ပြင်ဝယ်ပျံစေဟု အမိန့်တော်ရှိ၏။ ထိုသို့လျှင်ရေသည် တိရစ္ဆာန်အမျိုးအလိုက် များပြားစွာ မွေးဖွား၍၊ ငါးကြီးအစရှိသော အသက်ရှင်၍ လှုပ်ရှားတတ်သော တိရစ္ဆာန် အပေါင်းတို့ကို၎င်း၊ ပျံတတ်သော ငှက်မျိုးအပေါင်းတို့ကို၎င်း ဘုရားသခင်ဖန်ဆင်း၍၊ ထိုအမှုအရာကောင်းသည်ကို မြင်တော် မူ၏။” (ကမ္ဘာဦးကျမ်း ၁:၂၀-၂၁) ကျမ်းစာက ရှင်းလင်းစွာ ပြောထားသည်၊ ဤနေ့ရက်တွင် ဘုရားသခင်သည် ရေထဲ၌ သတ္တဝါများ၊ လေပေါ်တွင် ငှက်များကို ဖန်ဆင်းခဲ့သည်။ တစ်နည်းအားဖြင့်ဆိုသော် သူသည် ငါးနှင့် ငှက်အမျိုးမျိုးကို ဖန်ဆင်းပြီး ၎င်းတို့ကို အမျိုးအစားအလိုက် ခွဲခြားသတ်မှတ် ခဲ့သည်။ ဤနည်းလမ်းနှင့် ကမ္ဘာ၊ မိုးကောင်းကင်နှင့် ရေတို့သည် ဘုရားသခင်၏ဖန်ဆင်းခြင်းတို့နှင့် ပြည့်စုံနေခဲ့သည်။
ဘုရားသခင်၏နှုတ်ကပတ်တော်တို့ကို မိန့်ကြားလိုက် သည့်အခါတွင် သက်ရှိသတ္တဝါအသစ်များသည် မတူညီသည့်ပုံစံ တစ်ခုစီနှင့် ဖန်ဆင်းရှင်၏ နှုတ်ကပတ်တော်တို့အကြားတွင် ချက်ချင်း ရှင်သန်လာခဲ့သည်။ သူတို့သည် ကမ္ဘာပေါ်တွင် နေရာရရန်အတွက် တိုးဝှေ့ရင်း၊ ပျော်ရွှင်လျက် ခုန်ပေါက် မြူးထူးရင်း ဝင်လာခဲ့ကြသည်။ ပုံသဏ္ဌာန်နှင့် အရွယ်အစားမျိုးစုံ ရှိသည့် ငါးများသည် ရေထဲတွင် ကူးခတ်ကြသည်။ အခွံမာကောင်မျိုးစုံတို့သည် သဲထဲမှ တိုးထွက်လာကြသည်။ အကြေးခွံများပါသည့်၊ အခွံမာများပါသည့်၊ ကျောရိုးမဲ့သည့် သတ္တဝါတွေသည် ကြီးသည်ဖြစ်စေ၊ ငယ်သည်ဖြစ်စေ၊ ရှည်သည်ဖြစ်စေ၊ တိုသည်ဖြစ်စေ မတူညီသည့် ပုံစံများနှင့် လျင်မြန်စွာ ကြီးထွားလာကြသည်။ ထိုနည်းတူပင် ပင်လယ်ရေညှိအမျိုးမျိုးတို့သည် မတူညီသည့် ရေနေသတ္တဝါတို့၏ လှုပ်ရှားမှုအပေါ်တွင် ယိမ်းနွဲ့ရင်း၊ ညင်သာစွာ လှုပ်ရှားရင်း၊ တည်ငြိမ်နေသည့်ရေကို လှုံ့ဆော်ရင်းနှင့် တက်ကြွစွာ စတင်ကြီးထွားလာကြလိမ့်မည်။ မြန်မြန်လုပ်၊ သင့်သူငယ်ချင်းများ ကို ခေါ်ခဲ့၊ မည်သည့်အခါမျှ သင်အထီးကျန်ဖြစ်မည် မဟုတ်တော့ဟု ၎င်းတို့ကို ပြောလိုက်သည့်အလားပင် ဖြစ်သည်။ ဘုရားသခင်ဖန်ဆင်းခဲ့သည့် သက်ရှိသတ္တဝါ အမျိုးမျိုးတို့သည် ရေတွင် ပေါ်လာသည့်အချိန်မှစ၍ သက်ရှိအသစ် တစ်ကောင်ချင်း စီတိုင်းသည် အချိန်ကြာမြင့်စွာ တည်ငြိမ်နေသည့်ရေများကို သက်ဝင်လှုပ်ရှားလာစေခဲ့ပြီး ခေတ်သစ်တစ်ခုကို ဖွင့်လှစ်ပေး ခဲ့သည်။ ထိုအချိန်မှစပြီး သူတို့သည် အချင်းချင်း ခိုဝင်တိုးဝှေ့ ခဲ့ကြသည်။ မိတ်ဆွေဖွဲ့ခဲ့ကြသည်။ သူတို့ကြားတွင် ကင်းကွာမှု မထားကြတော့ပေ။ ရေသည် သူ၏ရင်ခွင်ထဲတွင် ခိုလှုံသည့် သက်ရှိတိုင်းကို ပြုစုရင်း ရေထဲတွင်ရှိသည့် သတ္တဝါများအတွက် ဖြစ်တည်ပြီး ရေ၏ ပြုစုဂရုစိုက်မှုကြောင့် ရေအတွက် သက်ရှိတိုင်းက ဖြစ်တည်ခဲ့သည်။ တစ်ကောင်ချင်းစီတိုင်းက အခြားတစ်ကောင်အပေါ်တွင် အသက်ကိုဖြစ်တည်စေသည်။ တစ်ချိန်တည်းတွင် အသီးသီးက အလားတူပင် ဖန်ဆင်းရှင်၏ ဖန်ဆင်းခြင်း၏ ဆန်းကြယ်မှုနှင့် ကြီးမြတ်မှုကို၊ ဖန်ဆင်းရှင်၏ သြဇာအာဏာ၏ မသာလွန်နိုင်သည့် တန်ခိုးကို သက်သေခံခဲ့သည်။
ပင်လယ်သည် တိတ်ဆိတ်ခြင်းမရှိတော့သည့်အားလျော်စွာ မိုးကောင်းကင်တွင်လည်း သက်ရှိတို့ စတင်ပြည့်နှက်လာခဲ့သည်။ ငှက်အကြီးအသေးတို့သည် တစ်ကောင်ပြီးတစ်ကောင် မြေကြီးမှ ကောင်းကင်ကို ပျံတက်သွားကြသည်။ ပင်လယ်ထဲက သတ္တဝါများ ကဲ့သို့မဟုတ်ဘဲ သူတို့တွင် ကြော့ရှင်းပြီး တင့်တယ်လှပသည့် သူတို့၏ပုံသဏ္ဌာန်များကို ဖုံးအုပ်ထားသည့် အမွှေး၊ အတောင်များ ရှိကြသည်။ ဖန်ဆင်းရှင်က သူတို့အပေါ် ချပေးသနားခဲ့သည့် ကျွမ်းကျင်မှုများနှင့် သူတို့၏ အထူးလုပ်ဆောင်ချက်များ၊ သူတို့၏ လှပသည့် အမွှေးအတောင်များကို ဂုဏ်ယူဝံ့ကြွားစွာ ပြသကြရင်း သူတို့၏အတောင်ပံများကို ခတ်ခဲ့ကြသည်။ သူတို့သည် မြက်ပြင်များနှင့် တောများ တစ်လျှောက် ကောင်းကင်နှင့် မြေကြီးကြားတွင် ကျွမ်းကျင်စွာနှင့် ခေါက်တုံ့ခေါက်ပြန် သွားလာရင်း လွတ်လပ်စွာ ပျံသန်းခဲ့ကြသည်။ သူတို့သည် လေ၏ အလွန်ချစ်ခင်ရသူများ ဖြစ်ခဲ့ကြသည်။ အရာအားလုံး၏ ချစ်ခင်ရသူတွေ ဖြစ်ခဲ့ကြလိမ့်မည်။ သူတို့သည် မကြာမီတွင် ကောင်းကင်နှင့်မြေကြီးကို ချည်နှောင်ပေးသူများဖြစ်လာကြမည် ဖြစ်ပြီး အရာအားလုံးဆီကို သတင်းစကားများ သယ်ယူပေး ကြမည်။ သူတို့သည် သီချင်းသီဆိုခဲ့ကြသည်။ ပျော်ရွှင်စွာနှင့် ထိုးဆင်းခဲ့ကြသည်။ သူတို့သည် တစ်ချိန်က ဘာမျှမရှိခဲ့သည့် ကမ္ဘာဆီကို ရွှင်လန်းမှုများ၊ ရယ်သံများနှင့် တက်ကြွမှုများ သယ်ဆောင်လာခဲ့ကြသည်။ သူတို့သည် သူတို့အပေါ်ကို ချပေးသနားခဲ့သည့် အသက်အတွက် ဖန်ဆင်းရှင်ကို ချီးမွမ်းရန် သူတို့၏နှလုံးသားအတွင်းက စကားလုံးများကို အသုံးပြုပြီး သူတို့၏ ကြည်လင်သာယာသည့် သီချင်းဆိုသံတို့ကို အသုံးပြုခဲ့ကြသည်။ သူတို့သည် ဖန်ဆင်းရှင်၏ ဖန်ဆင်းခြင်း၏ ပြည့်စုံမှု၊ ဆန်းကြယ်မှုတို့ကို ပြသရန်အတွက် ရွှင်လန်းစွာ ကခုန်ခဲ့ကြသည်။ သူတို့သည် သူတို့အပေါ် ဘုရားသခင် ချပေးသနားခဲ့သည့် ထူးမြတ်သည့်ဘဝမှတစ်ဆင့် ဖန်ဆင်းရှင်၏ သြဇာအာဏာကို သက်သေခံရန်အတွက် သူတို့၏ဘဝတစ်ခုလုံးကို အပ်နှံကြလိမ့်မည်။
၎င်းတို့သည် ရေထဲတွင်ရှိသည်ဖြစ်စေ၊ ကောင်းကင်တွင် ရှိသည်ဖြစ်စေ၊ ဖန်ဆင်းရှင်၏ ထိန်းချုပ်မှုအားဖြင့် ဤများပြား လှသည့် သက်ရှိများသည် မတူညီသည့် ဘဝပုံစံတို့နှင့် ဖြစ်တည်ခဲ့ ကြသည်။ ဖန်ဆင်းရှင်၏ ထိန်းချုပ်မှုအားဖြင့် ၎င်းတို့သည် မိမိတို့နှင့်သက်ဆိုင်သည့် မျိုးစိတ်များအလိုက် အတူတကွ စုဝေးခဲ့ကြသည်— ဤနိယာမ၊ ဤစည်းမျဉ်းကို မည်သည့်သတ္တဝါမျှ မပြောင်းလဲနိုင်ပေ။ ဖန်ဆင်းရှင်က ၎င်းတို့အတွက် ချမှတ်ထားသည့် ဘောင်များမှ မည်သည့်အခါမျှ ကျော်မသွားဝံ့ကြသကဲ့သို့ ကျော်သွားနိုင်သည့် အစွမ်းလည်း မရှိကြပေ။ ဖန်ဆင်းရှင် ချပေးခဲ့သည့်အတိုင်း ၎င်းတို့ရှင်သန်နေထိုင်ကာ ပွားများခဲ့ကြသည်။ ဖန်ဆင်းရှင်က ၎င်းတို့အတွက် ချမှတ်ထားခဲ့သည့် ဘဝပုံစံနှင့် နိယာမများအတိုင်း တစ်သဝေမတိမ်း လိုက်နာခဲ့ကြသည်။ ဖန်ဆင်းရှင်က သူတို့ကို ပေးအပ်ခဲ့သည့် ကောင်းကင်ဘုံနှင့်ဆိုင်သော အမိန့်များနှင့် စည်းမျဉ်းများ၊ နားလည်သိရှိပြီးဖြစ်သည့် အမိန့်များကို သတိပြုလျက် ယနေ့အထိ စောင့်ထိန်းခဲ့ကြသည်။ ၎င်းတို့သည် မိမိတို့၏ကိုယ်ပိုင် အထူးနည်းလမ်းဖြင့် ဖန်ဆင်းရှင်နှင့် စကားပြောခဲ့ကြပြီး ဖန်ဆင်းရှင်၏ ဆိုလိုရင်းကို သဘောပေါက်ခဲ့ကြသည်။ သူ၏အမိန့်များကို နာခံခဲ့ကြသည်။ ဖန်ဆင်းရှင်၏ သြဇာအာဏာကို မည်သူမျှ လုံးဝမချိုးဖောက် ခဲ့ကြပေ။ ၎င်းတို့အပေါ်တွင် ဖန်ဆင်းရှင်၏စိုးပိုင်မှုနှင့် အုပ်ချုပ်မှုတို့သည် သူ၏အတွေးထဲတွင် အလုပ်လုပ်ခဲ့ကြသည်။ မည်သည့်စကားလုံးမျှ ထုတ်မပြောခဲ့သော်လည်း ဖန်ဆင်းရှင်၏ ထူးခြားသည့် သြဇာအာဏာသည် လူသားမျိုးနွယ်နှင့် မတူညီသည့် ဘာသာစကားလုပ်ဆောင်မှု မပါဝင်သည့် တိတ်ဆိတ်မှုမျိုးနှင့် အရာအားလုံးကို ထိန်းချုပ်ခဲ့သည်။ ဤအထူးနည်းလမ်းနှင့် သူ၏ သြဇာအာဏာကို အသုံးပြုမှုသည် လူသားကို အသိပညာအသစ်ကို ရရှိစေခဲ့ပြီး ဖန်ဆင်းရှင်၏ထူးခြားသည့် သြဇာအာဏာအပေါ်တွင် ဖွင့်ဆိုမှုအသစ်များကို ပြုလုပ်စေခဲ့သည်။ ဤနေ့သစ်တွင် ဖန်ဆင်းရှင်၏ သြဇာအာဏာကို အသုံးချခြင်းသည် ဖန်ဆင်းရှင်၏ အတုမရှိခြင်းကို နောက်တစ်ကြိမ် ပြသခဲ့ခြင်းပင်ဖြစ်ကြောင်း သင်တို့ကို ငါပြောရမည်။
ပြီးနောက် ကျမ်းစာ၏ ဤအပိုဒ်က နောက်ဆုံးစာကြောင်းကို ကြည့်ကြစို့။ “ထိုအမှုအရာကောင်းသည်ကို မြင်တော်မူ၏။” ဤသည်မှာ အဘယ်အရာကိုဆိုလိုသည်ဟု သင်တို့ထင်သနည်း။ ဘုရားသခင်၏ စိတ်ခံစားချက်တို့သည် ဤနှုတ်ကပတ်တော်များ ထဲတွင် ပါဝင်နေသည်။ သူဖန်ဆင်းခဲ့သည့် အရာအားလုံးသည် အကောင်အထည်အဖြစ် ဖြစ်ပေါ်လာပြီး သူ့နှုတ်ကပတ်တော် များကြောင့် ခိုင်မာစွာရပ်တည်လာပြီး တဖြည်းဖြည်း စတင် ပြောင်းလဲလာသည်ကို ဘုရားသခင် စောင့်ကြည့်ခဲ့သည်။ ဤအချိန်တွင် ဘုရားသခင်သည် သူ၏နှုတ်ကပတ်တော်နှင့် ပြုလုပ်ခဲ့သည့် အရာဝတ္ထုအမျိုးမျိုးနှင့် သူပြီးမြောက်ခဲ့သည့် လုပ်ဆောင်ချက်အမျိုးမျိုးတို့အပေါ်တွင် ကျေနပ်မှုရှိခဲ့သလော။ အဖြေက “ထိုအမှုအရာကောင်းသည်ကို မြင်တော်မူ၏” ပင်ဖြစ်သည်။ ဤနေရာတွင် သင်တို့ အဘယ်အရာကိုတွေ့သနည်း။ “ထိုအမှုအရာကောင်းသည်ကို မြင်တော်မူ၏” ဆိုသည်မှာ အဘယ်အရာကို ကိုယ်စားပြုသနည်း။ အဘယ်အရာကို သင်္ကေတပြုသနည်း။ ပြီးမြောက်စေရန် သူရည်မှန်းထားသည့် ပန်းတိုင်ကို ပြီးမြောက်အောင်ပြုလုပ်ရန်နှင့် သူစီစဉ်ပြီး သတ်မှတ်ထားသည့်အရာကို ပြီးမြောက်အောင်ပြုလုပ်ရန် ဘုရားသခင်ထံတွင် တန်ခိုးနှင့် ဉာဏ်ပညာရှိသည်ဟု ဆိုလိုသည်။ ဘုရားသခင်သည် လုပ်ဆောင်မှုတစ်ခုစီတိုင်း ပြီးဆုံးသည့်အခါတွင် နောင်တရခဲ့သလော။ အဖြေက “ထိုအမှုအရာကောင်းသည်ကို မြင်တော်မူ၏” ဆိုသည်ပင် ဖြစ်နေသေးသည်။ တစ်နည်းပြောရလျှင် သူသည် နောင်တမရခဲ့ရုံတင်မကဘဲ ကျေနပ်မှုရရှိခဲ့သည်။ နောင်တမရခဲ့ပေဆိုသည်မှာ အဘယ်အရာကို ဆိုလိုသနည်း။ ဘုရားသခင်၏ အစီအစဉ်သည် စုံလင်သည်၊ သူ၏တန်ခိုးနှင့် ဉာဏ်ပညာသည် စုံလင်သည်၊ သူ၏သြဇာအာဏာ အားဖြင့်သာ ဤကဲ့သို့သော စုံလင်မှုမျိုးကို ပြီးမြောက်စေနိုင် သည်ဟု ဆိုလိုသည်။ လူသည် လုပ်ငန်းတာဝန်တစ်ခုကို လုပ်ဆောင်သည့်အခါတွင် ဘုရားသခင်ကဲ့သို့ပင် ထိုအရာက ကောင်းသည်ဟု မြင်နိုင်သလော။ လူသားပြုလုပ်သည့် အရာအားလုံးသည် စုံလင်ခြင်းသို့ ရောက်နိုင်သလော။ လူသားသည် အကြောင်းအရာတစ်ခုခုကို တစ်ကြိမ်တည်းနှင့် ထာဝရအတွက် ပြီးမြောက်အောင် ပြုလုပ်နိုင်သလော။ “ပြီးပြည့်စုံသည်ဆိုခြင်းမှာ မရှိပေ။ ပိုကောင်းသည်ဆိုခြင်းသာ ရှိသည်” ဟုလူတို့ပြောသည့်အတိုင်းပင် ဖြစ်သည်။ လူသားလုပ်သည့် မည်သည့်အရာမျှ စုံလင်မှုကို မရောက်ရှိနိုင်ပေ။ သူပြုလုပ်ခဲ့သည့်၊ ရရှိခဲ့သည့် အရာများက ကောင်းမွန်သည်ကို ဘုရားသခင် မြင်ခဲ့သောအခါ ဘုရားသခင်ပြုလုပ်သည့် အရာ အားလုံးသည် သူ၏နှုတ်ကပတ်တော်အားဖြင့် ပြင်ဆင် ပြုလုပ်ခြင်းဖြစ်သည်။ တစ်နည်းအားဖြင့် “ထိုအမှုအရာကောင်းသည်ကို မြင်တော်မူ၏” သူပြုလုပ်ခဲ့သည့်အရာ အားလုံးသည် အမြဲတည်သော သဏ္ဌာန်တစ်ခုကို ခံယူခဲ့ကြသည်။ အမျိုးအစားအလိုက် ခွဲခြားသတ်မှတ်ခံခဲ့ကြရပြီး ပုံသေနေရာ တစ်ခု၊ ရည်ရွယ်ချက်တစ်ခု၊ လုပ်ဆောင်မှုတစ်ခုကို တစ်ကြိမ်တည်း နှင့် ထာဝရကာလပတ်လုံးအတွက် ပေးအပ်ခြင်းခံခဲ့ရသည်။ ထို့အပြင် အရာအားလုံးအကြားတွင် ၎င်းတို့၏တာဝန်နှင့် အရာအားလုံးကို ဘုရားသခင်၏ စီမံခန့်ခွဲမှုအတွင်းတွင် သူတို့သွားရမည့် ခရီးသည် ဘုရားသခင်အားဖြင့် ချမှတ်ဆုံးဖြတ်ပေးပြီးဖြစ်ပြီး ပြောင်းလဲ၍မရပေ။ ဤသည်မှာ အရာအားလုံးကို ဖန်ဆင်းရှင်ပေးအပ်ထားသည့် ကောင်းကင်ဘုံနှင့် ဆိုင်သော ဥပဒေသဖြစ်သည်။
“ထိုအမှုအရာကောင်းသည်ကို မြင်တော်မူ၏” ဟူသော ရိုးရှင်းသည့်၊ လုံလုံလောက်လောက် အသိအမှတ်ပြုခြင်းမခံရသည့်၊ မကြာခဏ လျစ်လျူရှုခြင်းခံရသည့် ဤနှုတ်ကပတ်တော်တို့သည် ဘုရားသခင်က ဖန်ဆင်းခံအားလုံးကို ပေးအပ်ထားသည့် ကောင်းကင်ဘုံနှင့်ဆိုင်သည့် ဥပဒေသနှင့် ကောင်းကင်ဘုံနှင့် ဆိုင်သည့် အမိန့်ချမှတ်မှုဖြစ်သည်။ ယင်းတို့သည် ဖန်ဆင်းရှင်၏ သြဇာအာဏာ၏ အခြားသော ပြယုဂ်တစ်ခု၊ ပို၍ လက်တွေ့ကျသည့်အရာ၊ ပို၍နက်နဲသိမ်မွေ့သည့်အရာဖြစ်သည်။ သူ၏နှုတ်ကပတ်တော်တို့မှတစ်ဆင့် ဖန်ဆင်းရှင်သည် သူရရှိရန် ရည်မှန်းထားသည့်အရာအားလုံးကိုရရှိပြီး ပြီးမြောက်ရန် သူရည်မှန်းထားသည့် အရာအားလုံးကို ပြီးမြောက်ရုံတင်မကဘဲ သူဖန်ဆင်းခဲ့သည့်အရာအားလုံးကို သူ့လက်ထဲတွင် ထိန်းချုပ်နိုင်ပြီး သူ့သြဇာအာဏာအောက်တွင် သူပြုလုပ်ခဲ့သည့် အရာအားလုံးကို အုပ်စိုးနိုင်ခဲ့သည့်အပြင် အားလုံးက စနစ်ကျပြီး ပုံမှန်ဖြစ်ပေါ်သည်။ အရာအားလုံးသည် သူ့နှုတ်ကပတ်တော် အားဖြင့် အသက်ရှင်ပြီး သေဆုံးခဲ့ကြသည်။ ထို့အပြင် သူ၏သြဇာအာဏာအားဖြင့် သူချမှတ်ထားသည့် ဥပဒေသ အတွင်းတွင် ဖြစ်တည်ခဲ့ပြီး မည်သူမျှ လွတ်ကင်းခြင်းမရှိပေ။ ဤဥပဒေသသည် “ထိုအမှုအရာကောင်းသည်ကို မြင်တော်မူ၏” ဟူသည့်အချိန်ခဏချင်းတွင်ပင် စတင်ခဲ့ပြီး ဘုရားသခင်က ရုတ်သိမ်းသည့်နေ့ကိုမရောက်ခင်အထိ ဘုရားသခင်၏စီမံခန့်ခွဲမှု အစီအစဉ်အတွက် ဆက်လက် ဖြစ်တည်ပြီး လည်ပတ် နေမည်ဖြစ်သည်။ ဖန်ဆင်းရှင်၏အတုမရှိသည့် သြဇာအာဏာ ထင်ရှားသည်မှာ အရာအားလုံးကို ဖန်ဆင်းပြီး အရာအားလုံးကို ဖြစ်တည်လာစေရန် အမိန့်ပေးနိုင်သည့် သူ၏အစွမ်းတင် သာမကဘဲ အရာအားလုံးအပေါ်တွင် စိုးပိုင်ပြီး အချုပ်အခြာ အာဏာကို ကိုင်ဆောင်ထားနိုင်ကာ အရာအားလုံးအပေါ် အသက်နှင့် ရှင်သန်တက်ကြွမှုကို အပ်နှင်းနိုင်သည့် သူ၏အစွမ်းတွင်ပါ ထင်ရှားသည်။ ထို့အပြင် သူ၏အကြံအစည် ထဲတွင် သူဖန်ဆင်းမည့် အရာအားလုံးသည် သူဖန်ဆင်းထားသည့် ကမ္ဘာတွင် စုံလင်သည့်ပုံသဏ္ဌာန်၊ စုံလင်သည့် ဘဝတည်ဆောက်ပုံ၊ စုံလင်သည့်တာဝန်နှင့် အပြီးအပြတ် ဖြစ်ပေါ်တည်ရှိစေနိုင်သည့် သူ၏အစွမ်းတွင်လည်း ဖန်ဆင်းရှင်၏ အတုမရှိသည့် သြဇာအာဏာသည် ထင်ရှားသည်။ အလားတူပင် ဘုရားသခင်၏ အတွေးများသည် ချုပ်ချယ်ခြင်းများ မခံရဘဲ အချိန်၊ နေရာ သို့မဟုတ် ပထဝီအနေအထားတို့နှင့် ကန့်သတ်ထားခြင်းမရှိသည့် သဘောနှင့်လည်း ထင်ရှားသည်။ သူ၏သြဇာအာဏာကဲ့သို့ပင် ဖန်ဆင်းရှင်၏ အတုမရှိသည့် ဝိသေသလက္ခဏာသည် ထာဝရကာလမှ ထာဝရကာလအထိ မပြောင်းမလဲ တည်ရှိနေမည်ဖြစ်သည်။ သူ၏သြဇာအာဏာသည် သူ၏အတုမရှိသည့် ဝိသေသလက္ခဏာ၏ သင်္ကတေနှင့် ကိုယ်စားပြုသည့်အရာဖြစ်နေမည်ဖြစ်ပြီး သူ၏သြဇာအာဏာသည် သူ၏ ဝိသေသလက္ခဏာနှင့်အတူ ဘေးချင်းယှဉ်လျက် ထာဝရတည်ရှိနေမည်ဖြစ်သည်။
နှုတ်ကပတ်တော်သည် လူ့ဇာတိ၌ ပေါ်လာ၏ စာအုပ်ထဲရှိ “အတုမရှိ ဘုရားသခင်ကိုယ်တော်တိုင် (၁)” မှ