နောက်၊ ဘုရားသခင်နောက်လိုက်သောသူတို့၏ ရှင်ခြင်းနှင့်သေခြင်းသံသရာအကြောင်း ပြောကြစို့။ ဤအရာသည် သင်တို့နှင့်သက်ဆိုင်သည့်အတွက် အာရုံစိုက်လော့။ ပထမအနေဖြင့်၊ ဘုရားသခင် နောက်လိုက်သောသူများကို မည်သည့်အမျိုးအစားများ ခွဲခြားနိုင်သည်ကို စဉ်းစားလော့။ (ဘုရားသခင်မှ ရွေးချယ်သူများနှင့် အစေခံသူများ။) ဘုရားသခင်မှ ရွေးချယ်သူများနှင့် အစေခံသူများဟူ၍ နှစ်ခုရှိ၏။ ပထမ ငါတို့ ဘုရားသခင်ရွေးချယ်သူများအကြောင်းကို ပြောမည်။ ၎င်းတို့ အနည်းငယ်သာရှိသည်။ “ဘုရားသခင်၏ရွေးချယ်သောသူများ” ဆိုသည်မှာ မည်သည်ကို ရည်ညွှန်းသနည်း။ ဘုရားသခင်သည် အရာခပ်သိမ်းကို ဖန်ဆင်းပြီးနောက် လူသားဖြစ်ပေါ်သည့်အခါ ဘုရားသခင်သည် သူ့နောက်လိုက်သူတစ်စုကို ရွေးချယ်ခဲ့ကာ ၎င်းတို့ကို “ဘုရားသခင်၏ရွေးချယ်သောသူများ” ဟု ရိုးရှင်းစွာ ခေါ်ကြ၏။ ဤသူများကို ဘုရားသခင်ရွေးချယ်ခြင်းတွင် အထူးအတိုင်းအတာနှင့် အရေးပါမှုရှိ၏။ ထိုအတိုင်းအတာမှာ ဘုရားသခင်သည် အရေးပါသော အမှုကိုပြုတိုင်း ၎င်းတို့လာရမည်ဖြစ်သည်။ ဤသည်မှာ ၎င်းတို့အား ထူးခြားစေသည့် အရာများအနက် ပထမဆုံးအရာဖြစ်၏။ ၎င်းတို့၏ အရေးပါမှုမှာ အဘယ်နည်း။ ဘုရားသခင်မှ ၎င်းတို့အား ရွေးချယ်ခြင်းသည် ၎င်းတို့တွင် ကြီးမားသောအရေးပါမှုရှိ သည်ဟု ဆိုလိုခြင်း ဖြစ်သည်။ ဘုရားသခင်သည် ဤသူတို့အား ပြည့်စုံစေပြီး စုံလင်စေလိုသည့် ဆန္ဒရှိကာ သူ၏စီမံအုပ်ချုပ်သော အမှုပြီးဆုံးသွားသည့်အခါ သူသည် ဤလူတို့ကို ရယူလိမ့်မည်ဟု ဆိုလိုသည်။ ဤအရေးပါမှုမှာ ကြီးမားသည်မဟုတ်လော။ ထို့ကြောင့် ဤရွေးချယ်ခံရသူများသည် ဘုရားသခင်အတွက် ကြီးမားစွာအရေးကြီး၏။ အဘယ်ကြောင့်ဆိုသော် ထိုသူတို့သည် ဘုရားသခင်မှ ရယူရန် ရည်ရွယ်သူများဖြစ်ကြ၍ ဖြစ်သည်။ အစေခံသူများအတွက်မူ၊ ဘုရားသခင်၏ ကြိုတင်ခွဲခန့်မှတ်သားခြင်းမှ ခွဲထွက်၍၊ ၎င်းတို့၏ဇာစ်မြစ်များအကြောင်း ဦးစွာပြောကြစို့။ “အစေခံသူ” ၏ တိုက်ရိုက်အဓိပ္ပာယ်မှာ အစေခံသောသူဖြစ်၏။ အစေခံသောသူများသည် ယာယီဖြစ်၏။ ၎င်းတို့သည် ထိုသို့ ရေရှည် သို့မဟုတ် ထာဝရ မပြုလုပ်ဘဲ ယာယီ ခန့်အပ် သို့မဟုတ် စုဆောင်းခံရသူများဖြစ်၏။ ၎င်းတို့အများစုမှာ မယုံကြည်သူများ အကြားမှ ရွေးချယ်ထားသူများ ဖြစ်ကြ၏။ ၎င်းတို့ ကမ္ဘာမြေကြီးသို့ လာသည့်အချိန်သည် ဘုရားသခင်၏ အမှုတွင် အစေခံသူများ အခန်းကဏ္ဍကို ၎င်းတို့ တာဝန်ယူရန် အမိန့်ချမှတ်သော အချိန်ဖြစ်၏။ ၎င်းတို့သည် အရင်ဘဝက တိရစ္ဆာန်တစ်ကောင် ဖြစ်ခဲ့နိုင်သော်လည်း ၎င်းတို့သည် မယုံကြည်သူများအထဲမှ တစ်ဦးလည်း ဖြစ်နိုင်၏။ ယင်းမှာ အစေခံသူများ၏ ဇာစ်မြစ်များဖြစ်ကြ၏။

ဘုရားသခင်၏ ရွေးချယ်ခံရသူများထံ ပြန်သွားကြစို့။ ဘုရားသခင်၏ ရွေးချယ်ခံရသူများသည် ၎င်းတို့သေဆုံးသည့်အခါ မယုံကြည်သူများ၊ ယုံကြည်ခြင်းရှိသော လူ အမျိုးမျိုးတို့နှင့် လုံးဝကွဲပြားသောနေရာသို့သွားကြ၏။ ထိုနေရာတွင် ၎င်းတို့သည် ကောင်းကင်တမန်များနှင့် ဘုရားသခင်၏တမန်များ လိုက်ပါလျက် ဘုရားသခင် ကိုယ်တော်တိုင် စီမံအုပ်ချုပ်သည့် နေရာဖြစ်၏။ ဤနေရာတွင် ဘုရားသခင်ရွေးချယ်ခံရသောသူတို့သည် ၎င်းတို့၏ကိုယ်ပိုင်မျက်လုံးများဖြင့် ဘုရားသခင်ကို မမြင်နိုင်ကြသော်လည်း ဝိညာဉ်လောက၏ အခြားမည်သည့်နေရာနှင့်မျှ မတူပေ။ ၎င်းသည် ဤအစိတ်အပိုင်းမှလူတို့ သေဆုံးပြီးနောက် သွားသည့်နေရာဖြစ်၏။ ၎င်းတို့သေဆုံးသည့်အခါ ၎င်းတို့သည်လည်း ဘုရားသခင်၏တမန်များ၏ မညှာမတာ စုံစမ်းစစ်ဆေးခြင်းကို ခံရ၏။ မည်သည့်အရာကို စုံစမ်းစစ်ဆေးသနည်း။ ဘုရားသခင်၏တမန်များသည် ဤသူတို့ ဘုရားသခင်ကိုယုံကြည်ခြင်း၌ ၎င်းတို့၏ဘဝတစ်လျှောက်လုံး လျှောက်လှမ်းခဲ့သည့် လမ်းကြောင်းများ၊ ၎င်းအချိန်အတွင်း ထိုသူတို့သည် ဘုရားသခင်ကို ဆန့်ကျင်ခဲ့ဖူးခြင်း ရှိမရှိ၊ ကျိန်ဆဲခဲ့ဖူးခြင်း ရှိမရှိနှင့် ကြီးလေးသည့်အပြစ်များ သို့မဟုတ် မကောင်းမှုများ ကျူးလွန်ခဲ့ခြင်း ရှိမရှိကို စုံစမ်းစစ်ဆေးကြ၏။ ဤစုံစမ်းစစ်ဆေးမှုတွင် ထိုသူသည် ထွက်ခွာမည် သို့မဟုတ် နေမည်ဟူသည့်မေးခွန်းကို ဖြေရှင်း၏။ “ထွက်ခွာသည်” ဟူသည်မှာ မည်သည်ကို ရည်ညွှန်းသနည်း။ “နေသည်” ဟူသည်မှာ မည်သည်ကို ရည်ညွှန်းသနည်း။ “ထွက်ခွာသည်” ဟူသည်မှာ ၎င်းတို့၏အပြုအမူအပေါ် အခြေခံ၍ ၎င်းတို့သည် ဘုရားသခင်၏ ရွေးချယ်ခြင်းခံရသူများ၏အဆင့်အကြား ဆက်လက်တည်ရှိခြင်း ရှိမရှိကို ရည်ညွှန်း၏။ “နေသည်” ဟူသည်မှာ ၎င်းတို့သည် နောက်ဆုံးသောကာလအတွင်း ဘုရားသခင်၏ ပြည့်စုံစေခြင်း ခံရသူများအကြား ဆက်လက်တည်ရှိနိုင်ခြင်း ရှိမရှိကို ရည်ညွှန်း၏။ နေသူများအတွက် ဘုရားသခင်သည် အထူးအစီအမံများ ရှိသည်။ သူ၏အမှုကာလတစ်ခုစီတိုင်းအတွင်း ဘုရားသခင်သည် ထိုသို့သောလူတို့ကို တမန်တော်များ အဖြစ်ဆောင်ရွက်ရန် သို့မဟုတ် အသင်းတော်များကို ပြန်လည်နိုးထစေသည့်အမှု ပြုလုပ်ရန် သို့မဟုတ် ၎င်းတို့ကို စောင့်ရှောက်ရန် စေလွှတ်လိမ့်မည်။ သို့သော် ထိုကဲ့သို့သောအမှုကို ဆောင်ရွက်နိုင်စွမ်းရှိသူများ၏ ပြန်ဝင်စားသည့် အကြိမ်ရေနှုန်းမှာ ကြိမ်ဖန်တလဲ ပြန်လည်မွေးဖွားသော မယုံကြည်သူများလောက် မများပေ။ ယင်းအစား ထိုသူတို့သည် ဘုရားသခင်၏ အမှု၏ လိုအပ်ချက်များနှင့် အဆင့်များတို့နှင့်အညီ ကမ္ဘာမြေကြီးပေါ်သို့ ပြန်ပို့ခံရကာ၊ မကြာခဏ ဝင်စားသူများ မဟုတ်ကြပေ။ ထို့ကြောင့် ၎င်းတို့မည်သည့်အချိန်တွင် ပြန်ဝင်စားသည်နှင့်ပတ်သက်၍ စည်းမျဉ်းစည်းကမ်းများ ရှိသလော။ ၎င်းတို့သည် နှစ်အနည်းငယ်ကြာတိုင်း တစ်ကြိမ် လာကြသလော။ ထိုသူတို့သည် ဤကဲ့သို့သော အကြိမ်ရေနှုန်းဖြင့် လာကြသလော။ မလာကြပါ။ ဤအရာကို ဘုရားသခင်၏အမှု၊ သူ့အမှု၏အဆင့်များနှင့် သူ၏လိုအပ်ချက်များအပေါ်တွင် အခြေခံထားပြီး စည်းမျဉ်းစည်းကမ်းများ မရှိပေ။ တစ်ခုတည်းသောစည်းမျဉ်းမှာ ဘုရားသခင်သည် နောက်ဆုံးသောကာလအတွင်း သူ့အမှု၏နောက်ဆုံးအဆင့်ကို လုပ်ဆောင်သည့်အခါ၊ ဤရွေးချယ်ထားသောသူများ အားလုံး လာကြလိမ့်မည်။ သူတို့အားလုံး လာကြသည့်အခါ ဤသည်မှာ ထိုသူတို့ နောက်ဆုံးအကြိမ် ပြန်ဝင်စားခြင်း ဖြစ်လိမ့်မည်။ ဤသည်မှာ အဘယ်ကြောင့်နည်း။ ဤသည်မှာ ဘုရားသခင်၏အမှု၏ နောက်ဆုံးအဆင့်အတွင်း အထမြောက်ရမည့်ရလဒ်အပေါ် အခြေခံထားခြင်း ဖြစ်၏။ အဘယ်ကြောင့်ဆိုသော် အမှု၏နောက်ဆုံးသောအဆင့်တွင် ဘုရားသခင်သည် ဤရွေးချယ်ထားသောလူတို့ကို လုံးဝပြည့်စုံ စေလိမ့်မည်။ ဤသည်မှာ အဘယ်အရာကို ဆိုလိုသနည်း။ ဤနောက်ဆုံးသောအဆင့်တွင် ဤသူတို့သည် ပြည့်စုံစေခြင်းခံရ၍ စုံလင် စေခြင်း ခံရပါက ထိုသူတို့သည် ယခင်ကကဲ့သို့ ပြန်ဝင်စားကြလိမ့်မည် မဟုတ်ပေ။ လူသားဖြစ်ခြင်းလုပ်ငန်းစဉ်သည် လုံးဝပြီးဆုံး သွားမည်ဖြစ်သကဲ့သို့ ပြန်ဝင်စားသည့် လုပ်ငန်းစဉ်သည်လည်း လုံးဝပြီးဆုံးသွားပေမည်။ ဤသည်မှာ နေမည့်လူများနှင့် သက်ဆိုင်၏။ ထို့ကြောင့် မနေနိုင်သောသူများသည် မည်သည့်နေရာသို့ သွားကြသနည်း။ မနေနိုင်သောသူများ သွားစရာ သင့်တော်သောနေရာတစ်ခု ရှိ၏။ ပထမအနေဖြင့်၊ ၎င်းတို့၏ မကောင်းမှုပြုခြင်း၊ ၎င်းတို့ပြုလုပ်ခဲ့သည့်အမှားများနှင့် ၎င်းတို့ကျူးလွန်ခဲ့သည့်အပြစ်များ၏ ရလဒ်အနေဖြင့် ၎င်းတို့သည်လည်း အပြစ်ပေးခံရ၏။ ၎င်းတို့အပြစ်ပေးခံရပြီးနောက်၊ ဘုရားသခင်သည် အခြေအနေကို အကျိုးပြုသည်အတိုင်း သူတို့အား မယုံကြည်သူများ သို့မဟုတ် ယုံကြည်ခြင်းရှိသောလူအမျိုးမျိုးအကြား ရှိရန် စီမံလိမ့်မည်။ ဤသည်မှာ ၎င်းတို့အတွက် ဖြစ်နိုင်ခြေရှိသော အခြေအနေနှစ်ခုရှိသည်၊ တစ်ခုမှာ အပြစ်ဒဏ်ပေးခံရပြီးနောက် ၎င်းတို့ပြန်ဝင်စားသောအခါ ဘာသာတစ်ချို့မှ လူတို့အကြား နေရန်နှင့် အခြားတစ်ခုမှာ မယုံကြည်သူတစ်ဦးဖြစ်သွားရန် ဖြစ်ကောင်းဖြစ်နိုင်သည်ဟု ဆိုလိုခြင်းဖြစ်သည်။ ၎င်းတို့သည် မယုံကြည်သူတစ်ဦး ဖြစ်သွားပါက အခွင့်အလမ်းအားလုံး ဆုံးရှုံးသွားလိမ့်မည်။ သို့သော် ၎င်းတို့သည် ယုံကြည်ခြင်းရှိသော လူတစ်ဦး၊ ဥပမာ ခရစ်ယာန်တစ်ဦး ဖြစ်သွားပါက၊ ၎င်းတို့တွင် ဘုရားသခင်၏ ရွေးချယ်ခံရသူများ၏ အဆင့်များအကြားသို့ ပြန်သွားရန် အခွင့်အလမ်း ရှိသေး၏။ ဤအရာ၌ လွန်စွာရှုပ်ထွေးသော ဆက်နွယ်မှုများရှိ၏။ အတိုချုပ်အားဖြင့် ဘုရားသခင်၏ရွေးချယ်ခံရသူများသည် ဘုရားသခင်ကို ပုန်ကန်ပြစ်မှားသော တစ်စုံတစ်ရာပြုလုပ်သည့်အခါ ၎င်းတို့သည် အခြားသူများအားလုံးကဲ့သို့ပင် အပြစ်ပေးခံရလိမ့်မည်။ ဥပမာ ယခင်က ငါတို့ဆွေးနွေးခဲ့ကြသည့် ပေါလုကို ကြည့်လော့။ ပေါလုသည် အပြစ်ပေးခံရသူများ၏ ဥပမာတစ်ရပ်ဖြစ်သည်။ ငါပြောနေသည့်အကြောင်းအရာကို သင်တို့ သဘောပေါက်သလော။ ဘုရားသခင်၏ ရွေးချယ်ခံရသူများ၏ နယ်ပယ်မှာ တရားသေ သတ်မှတ်ထားသည်လော။ (၎င်း၏အများစုမှာ တရားသေသတ်မှတ်ထားသည်။) ၎င်း၏အများစုမှာ တရားသေသတ်မှတ်ထားသော်လည်း သေးငယ်သောအစိတ်အပိုင်းမှာ တရားသေသတ်မှတ်ထားခြင်း မရှိပေ။ ဤသည်မှာ အဘယ်ကြောင့်နည်း။ ဤနေရာ၌ ငါသည် အထင်ရှားဆုံးအကြောင်းရင်းဖြစ်သည့် မကောင်းမှု ကျူးလွန်ခြင်းကို ရည်ညွှန်းခဲ့ပြီးဖြစ်သည်။ ထိုသူတို့သည် မကောင်းမှုကျူးလွန်သည့်အခါ ဘုရားသခင်သည် ၎င်းတို့ကို မလိုချင်ပေ။ ထို့အပြင် ဘုရားသခင်သည် ၎င်းတို့ကို မလိုချင်သည့်အခါ သူသည် ၎င်းတို့အား လူမျိုးအမျိုးမျိုးနှင့် လူအမျိုးအစား အမျိုးမျိုးတို့အကြား ပစ်လိုက်သဖြင့် ၎င်းတို့တွင် မျှော်လင့်ချက် မရှိဘဲ ၎င်းတို့ ပြန်သွားရန် ခက်ခဲစေသည်။ ဤအရာအားလုံးသည် ဘုရားသခင်၏ ရွေးချယ်ခံရသောလူတို့၏ ရှင်ခြင်းနှင့် သေခြင်းသံသရာနှင့် ဆက်စပ်နေ၏။

ဤနောက်အကြောင်းအရာသည် အစေခံသူများ၏ ရှင်ခြင်းနှင့်သေခြင်း သံသရာနှင့် ဆက်နွှယ်နေ၏။ အစေခံသူများ၏ ဇာစ်မြစ်များအကြောင်းကို ငါတို့ ခုတင် ဆွေးနွေးခဲ့သည်။ ဆိုလိုသည်မှာ ၎င်းတို့သည် ၎င်းတို့၏ အတိတ်ဘဝများတွင် မယုံကြည်သူများနှင့် တိရစ္ဆာန်များ ဖြစ်ခဲ့ကြပြီးနောက် ပြန်ဝင်စားကြသည် ဆိုသည့်အချက် ဖြစ်သည်။ အမှု၏နောက်ဆုံးအဆင့် ရောက်ရှိသည့်အတွက်၊ ဘုရားသခင်သည် မယုံကြည်သူများမှ ထိုသို့သော လူတစ်စုကို ရွေးချယ်ထားပြီးဖြစ်ကာ ဤအုပ်စုသည် အထူးအုပ်စုဖြစ်၏။ ဤလူတို့ကို ရွေးချယ်ရခြင်းတွင် ဘုရားသခင်၏ ရည်မှန်းချက်မှာ သူ၏အမှုကို ၎င်းတို့ အစေခံရန်အတွက် ဖြစ်၏။ “အစေခံခြင်း” ဆိုသည်မှာ ကြားရသည်မှာ ရည်မွန်လှသောစကားလုံး မဟုတ်သကဲ့သို့၊ အ‌ယောက်တိုင်း၏ စိတ်ဆန္ဒများနှင့် မကိုက်ညီသော်လည်း၊ ယင်းသည် မည်သူ့ကို ရည်ရွယ်သည်ကို ငါတို့ကြည့်သင့်သည်။ ဘုရားသခင်၏ အစေခံသူများ တည်ရှိနေခြင်းသည် အထူး အရေးပါမှုတစ်ရပ် ရှိ၏။ ၎င်းတို့သည် ဘုရားသခင်၏ ရွေးချယ်ထားခြင်း ခံခဲ့ရသည့်အတွက် အခြားမည်သူမျှ ၎င်းတို့၏အခန်းကဏ္ဍကို မဆောင်ရွက်နိုင်ပေ။ ပြီးလျှင် ဤအစေခံသူများ၏ အခန်းကဏ္ဍမှာ အဘယ်နည်း။ ဘုရားသခင်၏ ရွေးချယ်ခံရသူများကို အစေခံရန်ဖြစ်၏။ အများအားဖြင့်၊ ၎င်းတို့၏အခန်းကဏ္ဍမှာ ဘုရားသခင်၏ အမှုကို အစေခံရန်၊ ဘုရားသခင်၏ အမှုတွင် ပူးပေါင်းလုပ်ဆောင်ရန်နှင့် ဘုရားသခင် ရွေးချယ်ထားသူများကို သူစုံလင်စေခြင်းအမှုကို ကူညီဆောင်ကြဉ်းပေးရန်တို့ ဖြစ်သည်။ ၎င်းတို့အနေဖြင့် အားထုတ်ကြိုးပမ်းနေကြခြင်း ရှိမရှိ၊ အမှု၏ ရှုထောင့်အချို့ကို ဆောင်ရွက်နေခြင်း ရှိမရှိ၊ သို့မဟုတ် အချို့သော အလုပ်များကို တာဝန်ယူခြင်း ရှိမရှိဆိုသည်ကို ပဓာနမထားဘဲ၊ ဤအစေခံသူများနှင့်ပတ်သက်၍ ဘုရားသခင်၏ သတ်မှတ်ချက်မှာ အဘယ်နည်း။ ၎င်းတို့နှင့်သက်ဆိုင်သည့် သူ၏သတ်မှတ်ချက်များမှာ အလွန်မညှာမတာ ဖြစ်လွန်းနေသလော။ (မဟုတ်ပါ။ ၎င်းတို့ကို သစ္စာစောင့်သိရန်သာ ဘုရားသခင် တောင်းဆိုပါသည်။) အစေခံသူများသည်လည်း သစ္စာစောင့်သိရမည်ဖြစ်၏။ သင်၏ဇာစ်မြစ် သို့မဟုတ် ဘုရားသခင်သည် သင့်ကို အဘယ်ကြောင့် ရွေးချယ်သည်ကို ပဓာနမထားဘဲ၊ သင်သည် ဘုရားသခင်ကိုလည်းကောင်း၊ သင့်ကို ဘုရားသခင် အပ်နှံသည့် မည်သည့် စေခိုင်းချက်တာဝန်များကိုမဆို၊ ပြီးလျှင် သင် တာဝန်ရှိသည့် အလုပ်နှင့် သင်ထမ်းဆောင်သည့် တာဝန်များကိုလည်းကောင်း သစ္စာစောင့်သိရမည်။ ဘုရားသခင်ကို သစ္စာစောင့်သိခြင်းနှင့် ကျေနပ်စေခြင်းငှာ တတ်စွမ်းနိုင်သည့် အစေခံသူများအတွက်၊ ၎င်းတို့၏အဆုံးသတ်မှာ မည်သည့်အရာ ဖြစ်လိမ့်မည်နည်း။ ၎င်းတို့ ဆက်လက်တည်ရှိနိုင်ကြလိမ့်မည်။ ဆက်လက်တည်ရှိသော အစေခံသူများဖြစ်ဖို့ရန်မှာ ကောင်းချီးမင်္ဂလာ တစ်ခုလော။ ဆက်လက်တည်ခြင်းသည် မည်သည့်အရာကို ဆိုလိုသနည်း။ ဤကောင်းချီးမင်္ဂလာ၏ အဓိပ္ပာယ်မှာ အဘယ်နည်း။ အဆင့်အတန်းတွင်၊ ၎င်းတို့သည် ဘုရားသခင်၏ရွေးချယ်ခံရသူများနှင့် တူပုံမရပေ။ ၎င်းတို့သည် ကွဲပြားပုံရ၏။ သို့သော် အမှန်တွင်၊ ဤဘဝတွင် ၎င်းတို့ မွေ့လျော်သည့် အရာသည် ဘုရားသခင်၏ ရွေးချယ်ခံသူတို့ မွေ့လျော်သည့်အရာနှင့် တူညီသည် မဟုတ်လော။ အနည်းဆုံးအနေဖြင့်၊ ယင်းသည် ဤဘဝတွင် တူညီပေသည်။ ဤအရာကို သင်တို့ မငြင်းကြပေ၊ ဟုတ်သည်မဟုတ်လော။ ဘုရားသခင်၏ မိန့်မြွက်ချက်များ၊ ဘုရားသခင်၏ ကျေးဇူးတော်၊ ဘုရားသခင်၏ ထောက်ပံ့မှု၊ ဘုရားသခင်၏ ကောင်းချီးမင်္ဂလာများ- ဤအရာများကို မည်သူ မမွေ့လျော်ဘဲ နေသနည်း။ ထိုသို့သော အလျှံပယ်ရှိခြင်းကို အယောက်တိုင်း မွေ့လျော် ခံစားကြ၏။ အစေခံသူတစ်ဦး၏ ကိုယ်ပိုင်လက္ခဏာသည် အစေခံမှုကို လုပ်ဆောင်သူတစ်ဦး ဖြစ်သော်လည်း၊ ဘုရားသခင်အဖို့၊ ၎င်းတို့သည် သူဖန်ဆင်းခဲ့သော အရာအားလုံးထဲမှ တစ်ဦးသာ ဖြစ်၏။ ၎င်းတို့၏ အခန်းကဏ္ဍမှာ အစေခံသူ၏ အခန်းကဏ္ဍသာ ဖြစ်သည်။ ၎င်းတို့နှစ်ဦးစလုံးသည် ဘုရားသခင်၏ ဖန်ဆင်းခံသတ္တဝါများ ဖြစ်သည့်အတွက်၊ အစေခံသူတစ်ဦးနှင့် ဘုရားသခင်၏ရွေးချယ်ခံရသူတစ်ဦးတို့အကြား ကွာခြားချက် တစ်ခုတစ်လေ ရှိသလော။ လက်တွေ့အားဖြင့် မရှိပေ။ အမည်ခံအားဖြင့် ပြောရလျှင် ကွာခြားချက်ရှိ၏၊ အနှစ်သာရနှင့် ၎င်းတို့ပါဝင်သည့် အခန်းကဏ္ဍအရ ကွာခြားချက်ရှိ၏- သို့ရာတွင် ဘုရားသခင်သည် ဤလူစုကို မမျှမတ မဆက်ဆံပေ။ ထို့ကြောင့် ဤလူများသည် အစေခံသူများဟု အဘယ်ကြောင့် သတ်မှတ်ခံထားရသနည်း။ သင်တို့သည် ဤအရာနှင့် သက်ဆိုင်၍ သိနားလည်မှုတစ်ခု ရှိရပေမည်။ အစေခံသူများသည် မယုံကြည်သူများထဲမှ လာကြ၏။ မယုံကြည်သူများထဲမှ ၎င်းတို့လာသည်ဟု ငါတို့ ဖော်ပြသည်နှင့် တစ်ပြိုင်နက်၊ ၎င်းတို့တွင် တူညီသည့် မကောင်းသည့် နောက်ခံသမိုင်း ရှိကြသည်မှာ သိသာပေသည်- ၎င်းတို့အားလုံးသည် ဘုရားမဲ့ဝါဒီများဖြစ်ကြပြီး၊ အတိတ်တွင်လည်း ထိုသို့ ဖြစ်ခဲ့ကြ၏။ ၎င်းတို့သည် ဘုရားသခင်ကို မယုံကြည်ကြသကဲ့သို့၊ ဘုရားသခင်၊ သမ္မာတရားနှင့် အပြုသဘောဆောင်သော အရာအားလုံးကို ရန်လိုခဲ့ကြသည်။ ၎င်းတို့သည် ဘုရားသခင်ကို သို့မဟုတ် ဘုရားသခင်တည်ရှိခြင်းကို မယုံကြည်ကြချေ။ ထိုသို့ဖြစ်သဖြင့်၊ ၎င်းတို့သည် ဘုရားသခင်၏ နှုတ်ကပတ်တော်များကို နားလည်ခြင်းငှာ တတ်စွမ်းနိုင်ကြပါသလော။ ကြီးမားသော အတိုင်းအတာအထိ ၎င်းတို့ နားလည်နိုင်စွမ်းမရှိဟု ပြောသည်မှာ တရားပေသည်။ တိရစ္ဆာန်များသည် လူ့စကားများကို နားလည်နိုင်စွမ်း မရှိကြသကဲ့သို့၊ အစေခံသူများသည် ဘုရားသခင် မည်သည့်အရာ ပြောနေသည်၊ မည်သည့်အရာကို သူ တောင်းဆိုသည်၊ သို့မဟုတ် ထိုသို့သော တောင်းဆိုချက်များကို သူ အဘယ်ကြောင့် ပြုသည်တို့ကို နားမလည် နိုင်ကြပေ။ ၎င်းတို့ နားမလည်ပေ။ ၎င်းတို့အဖို့ ဤအရာများသည် နားမလည်နိုင်ဖွယ်ရာ ဖြစ်ပြီး၊ ၎င်းတို့ ဉာဏ်အလင်းမရဘဲ ရှိနေကြ၏။ ဤအကြောင်းကြောင့်၊ ဤလူတို့သည် ငါတို့ပြောဆိုခဲ့သည့် အသက်ကို မပိုင်ဆိုင်ကြပေ။ အသက်မရှိဘဲနှင့်၊ သမ္မာတရားကို လူတို့ နားလည်နိုင်ကြသလော။ ၎င်းတို့သည် သမ္မာတရားဖြင့် ပြင်ဆင်ထားပါသလော။ ဘုရားသခင်၏နှုတ်ကပတ်တော်နှင့် သက်ဆိုင်သည့် အတွေ့အကြုံနှင့် အသိပညာတို့ကို ၎င်းတို့ ရှိကြပါသလော။ (မရှိပါ။) ယင်းမှာ အစေခံသူတို့၏ ဇာစ်မြစ်များဖြစ်၏။ သို့သော်၊ ဘုရားသခင်သည် ဤလူတို့ကို အစေခံသူများ ဖြစ်စေသည့်အတွက်၊ ၎င်းတို့နှင့်သက်ဆိုင်သည့် သူ၏သတ်မှတ်ချက်များတွင် စံနှုန်းများ ရှိဆဲဖြစ်၏။ သူသည် ၎င်းတို့အပေါ် အထင်အမြင်မသေးသကဲ့သို့၊ ၎င်းတို့အပေါ် ဝတ်ကျေတမ်းကျေ ပြုခြင်းလည်း မရှိပေ။ ၎င်းတို့သည် သူ၏နှုတ်ကပတ်တော်များကို နားမလည်ကြသကဲ့သို့၊ အသက်ကို ပိုင်ဆိုင်ခြင်း မရှိကြသော်လည်း၊ ဘုရားသခင်သည် ၎င်းတို့ကို ကြင်နာစွာ ဆက်ဆံဆဲဖြစ်ပြီး၊ ၎င်းတို့နှင့် သက်ဆိုင်သော သူ၏သတ်မှတ်ချက်များနှင့် ပတ်သက်လာသည့်အခါ စံနှုန်းများ ရှိဆဲဖြစ်၏။ သင်တို့သည် ယခုတင် ဤစံနှုန်းများနှင့် ပတ်သက်၍ ပြောဆိုခဲ့ကြသည်- ဘုရားသခင်ကို သစ္စာစောင့်သိခြင်းနှင့် သူပြောသည့်အရာကိုလုပ်ဆောင်ခြင်းတို့ ဖြစ်သည်။ သင်၏အစေခံမှုတွင်၊ သင်သည် လိုအပ်သည့်နေရာတွင် အစေခံရမည်ဖြစ်ပြီး၊ တကယ့်အဆုံးထိတိုင် အစေခံရမည်ဖြစ်၏။ သင်သည် သစ္စာစောင့်သိသော အစေခံသူတစ်ဦး ဖြစ်နိုင်ပါက၊ အဆုံးထိတိုင်အောင် အစေခံနိုင်ပြီး သင့်ကို ဘုရားသခင် အပ်နှံထားသည့် စေခိုင်းချက်တာဝန်ကို ဖြည့်ဆည်းနိုင်ပါက၊ သင်သည် တန်ဖိုးရှိသော အသက်တာကို အသက်ရှင်လိမ့်မည်ဖြစ်သည်။ ဤအရာကို သင် လုပ်ဆောင်နိုင်ပါက၊ သင်သည် ဆက်လက် တည်ရှိနိုင်လိမ့်မည်။ သင်သည် ဘုရားသခင်ကို သိရန် အနည်းငယ် သာ၍အားထုတ်ပါက၊ အနည်းငယ် သာ၍ကြိုးစားပါက၊ ဘုရားသခင်ကိုသိရန် သင်၏ကြိုးပမ်းအားထုတ်မှုများကို ဆတက်ထမ်းပိုး ပြုလုပ်နိုင်ပါက၊ ဘုရားသခင်ကို သိခြင်းအကြောင်း အနည်းငယ်ပြောဆိုနိုင်ပါက၊ သူ့အဖို့ သက်သေခံနိုင်ပါက၊ သည့်အပြင် သူ၏ အလိုတော်နှင့်သက်ဆိုင်သည့် တစ်စုံတစ်ရာကို သင် နားလည်နိုင်ပါက၊ ဘုရားသခင်၏အမှုတွင် ပူးပေါင်းဆောင်ရွက်နိုင်ပြီး၊ ဘုရားသခင်၏ ရည်ရွယ်ချက်များကို အတော်အတန် အရေးထားနိုင်ပါက၊ သင်သည် အစေခံသူတစ်ဦးအနေဖြင့် အခွင့်အလမ်းတွင် ပြောင်းလဲမှုတစ်ခု တွေ့ကြုံရလိမ့်မည်ဖြစ်သည်။ ဤအခွင့်အလမ်း၌ ပြောင်းလဲမှုသည် မည်သည့်အရာ ဖြစ်လိမ့်မည်နည်း။ သင်သည် ဆက်လက်တည်ရှိရုံသက်သက် ဖြစ်လိမ့်မည် မဟုတ်တော့ပေ။ သင်၏အပြုအမူအနေအထိုင်၊ သင်၏ကိုယ်ပိုင် မျှော်မှန်းချက်များနှင့် လိုက်စားမှုများအပေါ် မူတည်၍၊ ဘုရားသခင်သည် သင့်ကို ရွေးချယ်ခံရသူများထဲမှ တစ်ဦးဖြစ်စေလိမ့်မည်။ ဤအရာသည် အခွင့်အလမ်းထဲက သင်၏ ပြောင်းလဲမှု ဖြစ်လိမ့်မည်။ အစေခံသူများအတွက်၊ ဤအရာနှင့်ပတ်သက်၍ အကောင်းဆုံးသော အရာမှာ အဘယ်နည်း။ ယင်းမှာ ၎င်းတို့အနေဖြင့် ဘုရားသခင်၏ရွေးချယ်ခံရသူ ဖြစ်လာနိုင်ခြင်း ဖြစ်သည်။ အကယ်၍ ၎င်းတို့သည် ထိုသို့ဖြစ်ပါက၊ ယင်းမှာ ၎င်းတို့သည် မယုံကြည်သူများ ဖြစ်ကြသည့်ပုံစံကဲ့သို့ တိရစ္ဆာန်များအဖြစ် ဝင်စားတော့မည်မဟုတ်ဟု ဆိုလိုပေသည်။ ယင်းမှာ ကောင်းပါ၏လော။ ကောင်းပေသကဲ့သို့ သတင်းကောင်းလည်း ဖြစ်၏- ယင်းမှာ အစေခံသူများသည် ပုံသွင်း၍ရသည်ဟု ဆိုလိုပေသည်။ အစေခံသူများအတွက်၊ ဘုရားသခင်သည် ၎င်းတို့ကို အစေခံဖို့ ခွဲခန့်မှတ်သားလိုက်သည်နှင့်တစ်ပြိုင်နက်၊ ၎င်းတို့သည် ထိုသို့ ထာဝရ လုပ်ဆောင်ကြလိမ့်မည်ဆိုသည်မှာ မမှန်ပေ။ ထိုသို့ သေချာပေါက် မဟုတ်ပေ။ ဘုရားသခင်သည် ဤလူ၏ တစ်ဦးချင်း အပြုအမူနှင့် သင့်လျော်သည့် နည်းလမ်းဖြင့် ၎င်းတို့ကို ကိုယ်တွယ်ကာ တုန့်ပြန်မည်ဖြစ်သည်။

သို့ရာတွင်၊ တကယ့်အဆုံးထိတိုင် အစေမခံနိုင်သည့် စေခံသူများ ရှိ၏။ ၎င်းတို့၏ အစေခံမှုအတွင်းတွင်၊ လမ်းတစ်ဝက်၌ အရှုံးပေးကာ ဘုရားသခင်ကို စွန့်ပစ်သူများအပြင် အပြစ်များ တစ်သီတစ်တန်း ကျူးလွန်သော လူများ ရှိကြ၏။ ဘုရားသခင်၏ အမှုကို ကြီးမားသော ထိခိုက်မှု ဖြစ်စေပြီး ကြီးမားသော ဆုံးရှုံးမှု ဖြစ်ပေါ်စေသည့်သူများပင်ရှိပြီး၊ ဘုရားသခင်အား ကျိန်ဆဲသည့် အစေခံသူများ စသည်ဖြင့်ပင် ရှိကြ၏။ ဤသို့ ပြင်၍ မရသော အကျိုးဆက်များသည် မည်သည့်အရာကို ညွှန်ပြသနည်း။ ထိုသို့သော ဆိုးယုတ်သည့် လုပ်ရပ်တစ်ခုတစ်လေသည် ၎င်းတို့၏အစေခံမှု အဆုံးသတ်ခြင်းကို ညွှန်ပြပေလိမ့်မည်။ သင်၏ အစေခံမှုအတွင်း သင်၏အပြုအမူသည် လွန်ကဲစွာ ညံ့ဖျင်းလွန်းသောကြောင့်နှင့် သင်သည် လွန်လွန်းပြီ ဖြစ်သောကြောင့်၊ သင်၏အစေခံမှုက စံမမီသည်ကို ဘုရားသခင် တွေ့သည်နှင့်တစ်ပြိုင်နက်၊ သူသည် သင်၏ အစေခံရန် အရည်အချင်း ပြည့်မီမှုကို ဖယ်ရှားမည်ဖြစ်သည်။ သင့်ကို သူ အစေခံခွင့်ပြုတော့မည် မဟုတ်ပေ။ သူသည် သင့်အား သူ၏တကယ့်မြင်ကွင်းရှေ့နှင့် ဘုရားသခင်၏ အိမ်တော်မှ ဖယ်ရှားလိမ့်မည် ဖြစ်သည်။ သင်သည် အစေမခံလိုသည်မှာ ဟုတ်ပါသလော။ သင်သည် စဉ်ဆက်မပြတ် မကောင်းမှု ပြုလိုလျက်ရှိသည် မဟုတ်လော။ သင်သည် တစ်သမတ်တည်း သစ္စာမဲ့သည် မဟုတ်လော။ ကိုင်း ဒီလိုဆို၊ လွယ်ကူသည့် ဖြေရှင်းချက်တစ်ရပ် ရှိ၏- သင်၏ အစေခံရန် အရည်အချင်းပြည့်မီမှု ဖယ်ရှားခံရမည်ဖြစ်သည်။ ဘုရားသခင်အဖို့၊ အစေခံတစ်ဦးထံမှ ၎င်း၏ အစေခံရန် အရည်အချင်းပြည့်မီမှုကို ဖယ်ရှားခြင်းဆိုသည်မှာ ဤအစေခံသူ၏ အဆုံးသတ်ကို ကြေညာလိုက်ပြီ ဖြစ်သည်ဟု ဆိုလိုပြီး၊ ၎င်းတို့သည် ဘုရားသခင်ကို အစေခံရန် အရည်အချင်းမီတော့မည် မဟုတ်ပေ။ ဘုရားသခင်သည် ဤလူ၏အစေခံမှုကို နောက်ထပ် မလိုအပ်တော့သကဲ့သို့၊ မည်မျှကောင်းမွန်သော အရာများကို ၎င်းတို့ ပြောကောင်းပြောကြပါစေ၊ ထိုစကားများသည် အချည်းနှီး ဖြစ်ပေလိမ့်မည်။ အမှုအရာများ ဤအဆင့်ထိ ရောက်သည့်အခါတွင်၊ အခြေအနေသည် ပြန်လည်ပြုပြင်မရနိုင်သောအရာ ဖြစ်လာပြီးဖြစ်လိမ့်မည်။ ဤကဲ့သို့သော အစေခံသူများသည် ပြန်လမ်းရှိလိမ့်မည် မဟုတ်။ ပြီးလျှင် ဤကဲ့သို့သော အစေခံသူများကို ဘုရားသခင်သည် မည်သို့ ကိုင်တွယ်ဖြေရှင်း သနည်း။ သူသည် ၎င်းတို့အား အစေခံမှုမှ ရပ်စဲရုံမျှ ရပ်စဲသလော။ မဟုတ်ပေ။ သူသည် ၎င်းတို့အား ဆက်လက်တည်ရှိနေခြင်းမှ တားဆီးရုံမျှ တားဆီး သလော။ သို့မဟုတ် သူသည် ၎င်းတို့အား ဘေးဖယ်ထားပြီး၊ ၎င်းတို့ ပြောင်းလဲမှုတစ်ခု ပြုလုပ်ရန် စောင့်ဆိုင်းသလော။ မစောင့်ဆိုင်းပေ။ ဘုရားသခင်သည် အစေခံသူများနှင့် ပတ်သက်လာသည့်အခါ အမှန်တကယ် သိပ်ချစ်ခင်သည် မဟုတ်ပေ။ လူတစ်ဦးသည် ဘုရားသခင်ကို ၎င်းတို့၏ အစေခံရာ၌ ဤသဘောထားမျိုးရှိပါက၊ ဤသဘောထား၏ အကျိုးဆက်အနေဖြင့်၊ ဘုရားသခင်သည် ၎င်းတို့၏ အစေခံရန် အရည်အချင်း ပြည့်မီမှုကို ဖယ်ရှားလိမ့်မည် ဖြစ်ပြီး၊ မယုံကြည်သူများအလယ်သို့ ၎င်းတို့ကို နောက်တစ်ကြိမ် ပြန်ပစ်ထည့်လိမ့်မည် ဖြစ်သည်။ ပြီးလျှင် မယုံကြည်သူများ အလယ် ပြန်ပစ်ခြင်းခံရသော အစေခံသူတစ်ဦး၏ ကံကြမ္မာမှာ အဘယ်နည်း။ မယုံကြည်သူများ၏ ကံကြမ္မာနှင့် အတူတူဖြစ်၏- ၎င်းတို့သည် တိရစ္ဆာန် တစ်ကောင်အဖြစ် ပြန်ဝင်စားစေခြင်းခံရမည်ဖြစ်ပြီး၊ မယုံကြည်သူများကဲ့သို့ ဝိညာဉ်လောကတွင် အလားတူ အပြစ်ပေးခြင်းကို ရရှိမည် ဖြစ်သည်။ ထို့အပြင်၊ ထိုသို့သော လူသည် ဘုရားသခင်၏ အမှုနှင့် မည်သည့်ဆက်စပ်မှုမျှ မရှိတော့သည့်အတွက်၊ ဘုရားသခင်သည် ဤလူ၏အပြစ်ဒဏ်တွင် ကိုယ်တိုင် မည်သည့်စိတ်ဝင်စားမှုမျှ ရှိလိမ့်မည် မဟုတ်ပေ။ ဤသည်မှာ ဘုရားသခင်၌ ၎င်းတို့၏ ယုံကြည်မှု အသက်တာ၏နိဂုံး ဖြစ်သည်သာမက၊ ၎င်းတို့ကိုယ်တိုင်၏ ကံကြမ္မာ၏ နိဂုံးဖြစ်သည့်အပြင်၊ ၎င်းတို့ကံကြမ္မာနှင့် သက်ဆိုင်သည့် ကြေညာချက်လည်း ဖြစ်သည်။ ထို့ကြောင့်၊ အစေခံသူများသည် ညံ့ဖျင်းစွာ အစေခံပါက၊ မိမိတို့ကိုယ်တိုင် အကျိုးဆက်များကို ခံစားရမည်ဖြစ်သည်။ အစေခံသူတစ်ဦးသည် တကယ့်အဆုံးထိတိုင် အစေခံနိုင်စွမ်းမရှိပါက၊ သို့မဟုတ် လမ်းတစ်ဝက်တွင် ၎င်းတို့၏ အစေခံရန် အရည်အချင်းပြည့်မီမှု ဖယ်ရှားခံရပါက၊ မယုံကြည်သူများအလယ်သို့ ပစ်ထည့်ခြင်း ခံရမည်ဖြစ်ပြီး- ဤအရာဖြစ်ပျက်ပါက၊ ထိုသို့သော လူသည် ခြံမွေးတိရစ္ဆာန်များ နည်းတူ၊ အသိဉာဏ် သို့မဟုတ် ဆင်ခြင်တုံတရားမရှိသော လူများနည်းတူ ကိုင်တွယ်ဖြေရှင်းခြင်း ခံရလိမ့်မည်ဖြစ်သည်။ ငါဤသို့ပြောသည့်အခါ၊ သင်တို့နားလည်နိုင်သည်၊ မဟုတ်လော။

အထက်တွင်ဆိုခဲ့ပြီးဖြစ်သည်မှာ ဘုရားသခင်က သူ၏ ရွေးချယ်ထားသူများနှင့် အစေခံသူများ၏ ရှင်ခြင်းနှင့်သေခြင်း သံသရာအား ကိုင်တွယ်ပုံဖြစ်၏။ ဤအရာကို ကြားပြီးနောက်တွင်၊ သင်တို့ မည်သို့ ခံစားရသနည်း။ ငါသည် ယခင်က ဤအကြောင်းအရာကို ပြောဆိုဖူးသလော။ ဘုရားသခင်၏ ရွေးချယ်ခြင်းခံရသူများနှင့် အစေခံသူများနှင့်ပတ်သက်သည့် အကြောင်းအရာကို ငါ ပြောဆိုဖူးသလော။ ငါ အမှန်တကယ် ပြောဆိုဖူး၏၊ သို့သော် သင်တို့ မမှတ်မိပေ။ ဘုရားသခင်သည် သူ၏ရွေးချယ်ခြင်းခံရသူများနှင့် အစေခံသူများအပေါ် ဖြောင့်မတ်၏။ အခြေအနေအားလုံးတွင်၊ သူသည် ဖြောင့်မတ်၏။ ငါ မှန်သလော။ ဤအရာတွင် သင်အပြစ်ရှာနိုင်သည့် နေရာတစ်ခုခု ရှိသလော။ “ဘုရားသခင်သည် ရွေးချယ်ခံရသူများအပေါ် အဘယ်ကြောင့် သည်းခံလွန်းသနည်း။ ပြီးလျှင် သူသည် အစေခံသူများအပေါ် အဘယ်ကြောင့် အနည်းငယ်သာ သည်းခံသနည်း” ဟု ပြောမည့်လူများ ရှိသည်မဟုတ်လော။ တစ်စုံတစ်ဦးသည် အစေခံသူများအတွက် ရပ်တည်ပေးရန် ဆန္ဒရှိသလော။ “ဘုရားသခင်သည် အစေခံသူများအား အချိန်ပို၍ ပေးနိုင်သလော၊ ပြီးလျှင် ၎င်းတို့အပေါ် သာ၍ စိတ်ရှည်ပြီး သည်းခံနိုင်သလော။” ထိုသို့သော မေးခွန်းကို ဖွင့်ဟရန်မှာ မှန်ကန်သလော။ (မမှန်ပေ။) ပြီးလျှင် အဘယ်ကြောင့် မမှန်သနည်း။ (အစေခံသူများဖြစ်စေခြင်း လုပ်ရပ်မှတစ်ဆင့်ဖြင့်သာ အမှန်တကယ် ကျွန်ုပ်တို့ မျက်နှာသာပေးခံရခဲ့ပြီး ဖြစ်သောကြောင့် ဖြစ်ပါသည်။) အစေခံသူများသည် အစေခံရန် အခွင့်ပေးခံရခြင်း သက်သက်ဖြင့် မျက်နှာသာပေးခံရကြပြီး ဖြစ်သည်။ “အစေခံသူများ” ဟူသည့် အမည် မရှိဘဲနှင့်၊ ပြီးလျှင် ၎င်းတို့ လုပ်သည့် အလုပ်မရှိဘဲနှင့်၊ ဤလူများသည် မည်သည့်နေရာတွင် ရှိမည်နည်း။ ၎င်းတို့သည် ခြံမွေးတိရစ္ဆာန်များနှင့်အတူ အသက်ရှင်ရင်းနှင့် သေဆုံးရင်း၊ မယုံကြည်သူများအလယ်တွင် ရှိကြပေမည်။ ၎င်းတို့သည် ယနေ့တွင် ဘုရားသခင်၏ ရှေ့မှောက်သို့ လာဖို့နှင့် ဘုရားသခင်၏ အိမ်တော်သို့ လာဖို့ အခွင့်ပေးခံရလျက်၊ မွေ့လျော်ခံစားရသည့် ကျေးဇူးတော်များမှာ ကြီးမားလှပေတကား။ ဤသည်မှာ အင်မတန် ကြီးမားသော ကျေးဇူးတော် တစ်ခု ဖြစ်၏။ ဘုရားသခင်သည် သင့်အား အစေခံရန် အခွင့်အရေးကို မပေးပါက၊ သင်သည် သူ၏ရှေ့မှောက်သို့ လာရန် အခွင့်အရေး မည်သည့်အခါတွင်မျှ ရှိမည် မဟုတ်ပေ။ အနည်းဆုံးအနေဖြင့်ပြောရလျှင်၊ သင်သည် ဗုဒ္ဓဘာသာဝင်တစ်ဦးဖြစ်ကာ ပေါက်မြောက်မှုကို ရရှိထားပြီး ဖြစ်လျှင်ပင်၊ အများဆုံးအနေဖြင့် သင်သည် ဝိညာဉ်လောကတွင် လက်တိုလက်တောင်းလုပ်ရသူ တစ်ဦးသာဖြစ်၏။ သင်သည် ဘုရားသခင်ကို မည်သည့်အခါတွင်မျှ တွေ့ရမည်မဟုတ်၊ သူ၏အသံ သို့မဟုတ် သူ၏ နှုတ်ကပတ်တော်များကို ကြားရမည်မဟုတ်၊ သို့မဟုတ် သူ၏ချစ်ခြင်းမေတ္တာနှင့် ကောင်းချီးမင်္ဂလာများကို ခံစားရမည်မဟုတ်သကဲ့သို့၊ သင်သည် သူနှင့် မျက်နှာချင်းဆိုင်လာရဖို့ မည်သည့်အခါမျှ ဖြစ်နိုင်မည် မဟုတ်ပေ။ ဗုဒ္ဓဘာသာဝင်များအနေဖြင့် ၎င်းတို့ ရှေ့မှောက်တွင် ရှိသည့် တစ်ခုတည်းသောအရာမှာ ရိုးရှင်းသည့် အလုပ်တာဝန်များ ဖြစ်၏။ ၎င်းတို့သည် ဘုရားသခင်အားသိရန် မဖြစ်နိုင်သကဲ့သို့၊ ၎င်းတို့အနေဖြင့် လိုက်နာကာ နာခံရုံသာ ရှိသည်။ အစေခံသူများမှာမူ အမှု၏ဤအဆင့်အတွင်းတွင် များစွာရရှိကြ၏။ ပထမဦးစွာ၊ ၎င်းတို့သည် ဘုရားသခင်နှင့် မျက်နှာချင်းဆိုင်ဖို့ လာနိုင်ကြသည်၊ သူ၏အသံကို ကြားနိုင်ကြသည်၊ သူ၏နှုတ်ကပတ်တော်များကို ကြားနိုင်ကြပြီး၊ လူတို့အပေါ် သူအပ်နှင်းသည့် ကျေးဇူးတော်များနှင့် ကောင်းချီးမင်္ဂလာများကို တွေ့ကြုံခံစားနိုင်ကြလေသည်။ ထို့အပြင်၊ ၎င်းတို့သည် ဘုရားသခင် အပ်နှင်းသည့် နှုတ်ကပတ်တော်များနှင့် သမ္မာတရားများကို မွေ့လျော်ခံစားနိုင်ကြ၏။ အစေခံသူများသည် အမှန်တကယ် မြောက်မြားလှစွာ ရရှိကြပေသည်။ ထို့ကြောင့် အစေခံသူတစ်ဦးအနေဖြင့် သင်သည် သင့်တော်သည့် ကြိုးပမ်းအားထုတ်မှုပင် မပြုနိုင်ပါက၊ ဘုရားသခင်သည် သင့်ကို ထားရှိနိုင်သေးသလော။ သူသည် သင့်ကို မထားနိုင်ပေ။ သူသည် သင့်ထံမှ များစွာ မတောင်းဆိုသော်လည်း၊ သင်သည် သူတောင်းဆိုသည့် မည်သည့်အရာကိုမျှ မှန်ကန်စွာ မလုပ်ဆောင်ပေ။ သင်သည် သင်၏တာဝန်ကို စောင့်ထိန်းခြင်း မရှိလေပြီ။ ထို့သို့ဖြစ်သဖြင့်၊ ဘုရားသခင်သည် သင့်ကို မထားနိုင်သည်မှာ သေချာ၏။ ဘုရားသခင်၏ ဖြောင့်မတ်သော စိတ်သဘောထားမှာ ယင်းသို့ဖြစ်သည်။ ဘုရားသခင်သည် သင့်ကို အလိုမလိုက်လွန်းသော်လည်း၊ သူသည် သင့်အပေါ် ခွဲခြားဆက်ဆံခြင်းလည်း မရှိပေ။ ဤအရာများသည် ဘုရားသခင် ပြုမူသည့် အခြေခံသဘောတရားများဖြစ်၏။ ဘုရားသခင်သည် လူများနှင့် သတ္တဝါများ အားလုံးကို ဤပုံစံဖြင့် ဆက်ဆံလေသည်။

ဝိညာဉ်လောကနှင့်ပတ်သက်၍ ဝိညာဉ်လောကရှိ သတ္တဝါအမျိုးမျိုးသည် အမှားအယွင်း တစ်စုံတစ်ရာ ပြုလုပ်လျှင်၊ ၎င်းတို့၏အလုပ်ကို မှန်ကန်စွာ မလုပ်လျှင်၊ ဘုရားသခင်တွင်လည်း ၎င်းတို့ကို ကိုင်တွယ်ရန် အလားတူ လိုက်လျောညီထွေသော ကောင်းကင်ဘုံနှင့်ဆိုင်သည့် အမိန့်ပြန်တမ်းများနှင့် အမိန့်များရှိ၏။ ဤသည်မှာ အကြွင်းမဲ့ဖြစ်၏။ ထို့ကြောင့် ဘုရားသခင်၏ အနှစ် ထောင်ပေါင်းများစွာသော စီမံခန့်ခွဲသည့်အမှုကာလအတွင်း အမှားပြုလုပ်ခဲ့သည့် အချို့သော ဘိလစ်စာရေးများ မျိုးဖြုတ်ခံရကာ၊ အချို့မှာ ယနေ့ ထိန်းသိမ်းခံရနေဆဲဖြစ်၍ အပြစ်ပေးခံရနေဆဲဖြစ်၏။ ဤသည်မှာ ဝိညာဉ်လောကရှိ သတ္တဝါတိုင်း ရင်ဆိုင်ရမည့်အရာဖြစ်၏။ ၎င်းတို့သည် အမှားအယွင်း တစ်စုံတစ်ရာပြုလုပ်လျှင်ဖြစ်စေ၊ မကောင်းမှု တစ်စုံတစ်ရာ ကျူးလွန်သည်ဖြစ်စေ အပြစ်ပေးခံရ၏။ ဤသည်မှာ ဘုရားသခင်သည် သူ၏ရွေးချယ်ခြင်းခံရသူများနှင့် အစေခံသူများအပေါ် ချဉ်းကပ်နည်းနှင့် အတူတူပင်ဖြစ်၏။ ထို့ကြောင့် ဝိညာဉ်လောကတွင်ဖြစ်စေ၊ ရုပ်ဝတ္ထုလောကတွင်ဖြစ်စေ၊ ဘုရားသခင်ပြုမူဆောင်ရွက်သည့် အခြေခံသဘောတရားများသည် မပြောင်းလဲပေ။ သင်သည် ဘုရားသခင်၏ ဆောင်ရွက်ချက်များကို မြင်နိုင်သည်ဖြစ်စေ၊ မြင်နိုင်ခြင်း မရှိသည်ဖြစ်စေ၊ မည်သို့ပင်ဖြစ်စေကာမူ ၎င်းတို့၏အခြေခံသဘောတရားများမှာ ပြောင်းလဲခြင်းမရှိပေ။ တစ်လျှောက်လုံးတွင် ဘုရားသခင်သည် အရာခပ်သိမ်းအပေါ် သူ၏ချဉ်းကပ်မှုနှင့် အရာခပ်သိမ်းကို သူ၏ကိုင်တွယ်မှုတွင် တူညီသော အခြေခံသဘောတရားများ ရှိသည်။ ဤသည်မှာ ပြောင်းလဲ၍မရပေ။ ဘုရားသခင်သည် မယုံကြည်သူများအကြား၌ သင့်တော်စွာနေသောသူများအပေါ် ကြင်နာ၍ ဘာသာတစ်ရပ်စီတိုင်းရှိ လိမ္မာ၍ မကောင်းမှုမပြုသူများအတွက် အခွင့်အရေးများ ချန်ထားပေးကာ ဘုရားသခင်မှ စီမံခန့်ခွဲသည့် အရာခပ်သိမ်းရှိ ၎င်းတို့၏အခန်းကဏ္ဍတွင် ပါဝင်ခွင့်ပေး၍ ၎င်းတို့လုပ်သင့်သည့်အရာကို လုပ်ခွင့်ပြုသည်။ အလားတူစွာပင် ဘုရားသခင်နောက်လိုက်သူများအကြား၊ သူရွေးချယ်ထားသောလူတို့အကြား၊ ဘုရားသခင်သည် သူ၏အခြေခံသဘောတရားများနှင့်အညီ မည်သူ့ကိုမျှ ခွဲခြားဆက်ဆံခြင်း မရှိပေ။ သူသည် စိတ်ရင်းမှန်ဖြင့် သူ့နောက်လိုက်သူတိုင်းအပေါ် ကြင်နာ၍ စိတ်ရင်းမှန်ဖြင့် သူ့နောက်လိုက်သူတိုင်းကို ချစ်၏။ မယုံကြည်သူများ၊ ယုံကြည်ခြင်းရှိသော လူအမျိုးမျိုးနှင့် ဘုရားသခင်၏ရွေးချယ်ခံရသူများစသည်ဖြင့် ထိုသူအမျိုးမျိုးတို့အတွက်သာ ဘုရားသခင်ချပေးသည့်အရာ ကွဲပြား၏။ မယုံကြည်သူများကို ကြည့်ကြစို့။ ၎င်းတို့သည် ဘုရားသခင်ကို မယုံကြည်ဘဲ ဘုရားသခင်သည် ၎င်းတို့အား ခြံမွေးတိရစ္ဆာန်များကဲ့သို့ မြင်သော်လည်း အရာခပ်သိမ်းအကြားတွင် ၎င်းတို့တစ်ဦးစီတိုင်းသည် စားစရာအစာရှိ၏၊ ကိုယ်ပိုင်နေရာရှိကာ ပုံမှန် ရှင်ခြင်းနှင့်သေခြင်း သံသရာရှိ၏။ မကောင်းမှုပြုသူတို့သည် အပြစ်ပေးခြင်းခံရကာ ကောင်းမှုပြုသူများသည် ကောင်းချီးခံစားရ၍ ဘုရားသခင်၏ အကြင်နာကို လက်ခံရရှိကြ၏။ ၎င်းမှာ ဤသို့ပင်မဟုတ်လော။ ယုံကြည်ခြင်းရှိသောလူ များအတွက် ပြန်လည်မွေးဖွားခြင်း တစ်ကြိမ်ပြီးနောက် တစ်ကြိမ်ဖြစ်တိုင်း ၎င်းတို့သည် ဘာသာရေး ကျင့်ဝတ်သီလများကို အတိအကျ လိုက်နာနိုင်ပါက၊ ၎င်းပြန်လည်မွေးဖွားခြင်းများအားလုံး၏နောက်ပိုင်းတွင် ဘုရားသခင်သည် အဆုံး၌ ၎င်းတို့အတွက် သူ၏ကြေညာချက် ပြုလုပ်လိမ့်မည်။ အလားတူစွာပင် ယနေ့ သင်သည် ဘုရားသခင်၏ ရွေးကောက်ခံရသူတစ်ဦးဖြစ်စေ၊ အစေခံသူတစ်ဦးဖြစ်စေ၊ သင်တို့ကိုလည်း အတန်းထဲသို့ ခေါ်သွင်းလိမ့်မည်ဖြစ်ပြီး သူချမှတ်ထားသော စည်းမျဉ်းစည်းကမ်းများ၊ စီမံအုပ်ချုပ်မှုအမိန့်များနှင့်အညီ သင်တို့၏အဆုံးသတ်ကို ဆုံးဖြတ်လိမ့်မည်။ ဘာသာအမျိုးမျိုးနှင့်သက်ဆိုင်သော ယုံကြည်ခြင်းရှိသော လူအမျိုးအစားအမျိုးမျိုးဖြစ်သည့်၊ ဤလူအမျိုးအစား အမျိုးမျိုးအကြား ဘုရားသခင်သည် နေထိုင်စရာနေရာ ပေးခဲ့ပြီးပြီလော။ ယုဒဘာသာသည် မည်သည့်အရပ်တွင်ရှိသနည်း။ ဘုရားသခင်သည် ထိုသူတို့၏ယုံကြည်ခြင်းတွင် ဝင်ရောက်နှောင့်ယှက်ပြီလော။ မနှောင့်ယှက်ခဲ့ပြီ မဟုတ်လော။ ထို့အပြင် ခရစ်ယာန်ဘာသာ မှာ အဘယ်နည်း။ ၎င်းကိုလည်း သူမနှောင့်ယှက်ခဲ့ပေ။ သူသည် ၎င်းတို့အား ၎င်းတို့၏ လုပ်ထုံးလုပ်နည်းများကို လိုက်နာခွင့်ပြုကာ၊ ၎င်းတို့အား စကားလည်းမပြော၊ ဉာဏ်အလင်းလည်းမပေးသည့်အပြင်၊ ၎င်းတို့အား မည်သည့်အရာမှ ဖော်ပြခြင်း မရှိပေ။ “သင်မှ မှန်သည်ဟုထင်ပါက၊ ထိုနည်းအတိုင်း ယုံကြည်လော့။” ဘရင်ဂျီတို့သည် မာရိကိုယုံကြည်ကြ၍၊ မာရိအားဖြင့် ဤသတင်းသည် ယေရှုထံသို့ ရောက်သွားခြင်းဖြစ်သည်။ ဤသည်မှာ ၎င်းတို့၏ယုံကြည်မှုပုံစံ ဖြစ်သည်။ ဘုရားသခင်သည် ထိုသူတို့၏ယုံကြည်ခြင်းကို ပြုပြင်ခဲ့ဖူးသလော။ ဘုရားသခင်သည် ၎င်းတို့အား စိတ်ကြိုက်လုပ်ကိုင်ခွင့်ပေး၏။ ၎င်းတို့အား လုံးဝဂရုမပြုဘဲ နေထိုင်စရာနေရာတစ်ခုပေး၏။ မွတ်စလင်များနှင့် ဗုဒ္ဓဘာသာဝင်များအပေါ်လည်း သူသည် ဤသို့ပင်လော။ ထိုသူတို့အတွက်လည်း သူသည် ကန့်သတ်ချက်များ သတ်မှတ်ခဲ့ကာ၊ ၎င်းတို့၏သက်ဆိုင်ရာယုံကြည်ခြင်းများတွင် ဝင်ရောက်နှောင့်ယှက်ခြင်း မရှိဘဲ ၎င်းတို့၏ကိုယ်ပိုင်နေထိုင်ရာနေရာများ ရှိခွင့်ပြု၏။ အရာခပ်သိမ်းကို ကောင်းမွန်စွာ စနစ်တကျစီမံထား၏။ ထို့ကြောင့် ဤအရာအားလုံးတွင် သင်တို့မည်သည့်အရာတွေ့သနည်း။ ဘုရားသခင်သည် သြဇာအာဏာပိုင်ဆိုင်သော်လည်း သူသည် သူ၏သြဇာအာဏာကို အလွဲသုံးစားမပြုသည်ကို တွေ့၏။ ဘုရားသခင်သည် အရာခပ်သိမ်းကို စုံလင်စွာ စနစ်တကျစီမံထား၏။ ဘုရားသခင်သည် နည်းစနစ်ကျနကာ ဤသည်တွင် သူ၏ဉာဏ်အမြော်အမြင်နှင့် အနန္တတန်ခိုး ပါရှိ၏။

ယနေ့ ငါတို့သည် ဝိညာဉ်လောကနှင့်သက်ဆိုင်သည့် ထူးခြားသော အကြောင်းအရာသစ်တစ်ခုအကြောင်း ပြောခဲ့သည်။ ၎င်းသည် ဝိညာဉ်လောကအပေါ် ဘုရားသခင်၏ စီမံအုပ်ချုပ်မှုနှင့် အုပ်စိုးမှု လက္ခဏာသွင်ပြင် တစ်ရပ်ဖြစ်၏။ ဤအရာများကို သင်တို့နားမလည်သည့်အခါ သင်တို့သည် “ဤအရာနှင့်ပတ်သက်သည့် အရာအားလုံးသည် နက်နဲမှုတစ်ရပ်ဖြစ်ပြီး ကျွန်ုပ်တို့၏ အသက်တာအတွင်း ဝင်ရောက်မှုနှင့် လုံးဝသက်ဆိုင်ခြင်းမရှိ၊ ဤအရာတို့သည် လူတို့ အကယ်စင်စစ်နေထိုင်ပုံနှင့် ကင်းကွာနေကာ၊ ၎င်းတို့ကို ကျွန်ုပ်တို့ နားလည်ရန်မလို၊ ၎င်းတို့အကြောင်းကိုလည်း ကျွန်ုပ်တို့ မကြားလို။ ၎င်းတို့သည် ဘုရားသခင်ကို သိခြင်းနှင့် လုံးဝဆက်စပ်ခြင်းမရှိ။” ဟု ပြောကောင်းပြောခဲ့ကြလိမ့်မည်။ ယခု ဤကဲ့သို့သောအတွေးအခေါ်သည် ပြဿနာရှိသည်ဟု သင်တို့ထင်သလော။ ၎င်းမှာ မှန်ကန်ပါ၏လော။ (မမှန်ကန်ပါ။) ဤကဲ့သို့သောအတွေးအခေါ်သည် မမှန်ကန်ဘဲ ကြီးလေးသည့်ပြဿနာများစွာ ရှိ၏။ အဘယ်ကြောင့်ဆိုသော် သင်သည် အရာခပ်သိမ်းအပေါ် ဘုရားသခင်မည်သို့အုပ်ချုပ်သည်ကို နားလည်လိုပါက သင်သည် သင်မြင်တွေ့နိုင်သည့်အရာနှင့် သင်၏တွေးခေါ်မှုမှ ရယူနိုင်သည့်အရာကိုသာ နားလည်၍မရပေ။ သင်သည် သင်မမြင်နိုင်သော အခြားလောက၏အရာအချို့ဖြစ်သော်လည်း သင်မြင်နိုင်သော ဤလောကနှင့်ခွဲခြား၍မရအောင် ချိတ်ဆက်နေသော အရာအချို့ကိုလည်း သင်နားလည်ရမည်ဖြစ်သည်။ ဤသည်မှာ ဘုရားသခင်၏အချုပ်အခြာအာဏာ၊ “ဘုရားသခင်သည် အရာခပ်သိမ်းအတွက် အသက်အရင်းအမြစ် ဖြစ်၏” ဟူသော အကြောင်းအရာနှင့် ပတ်သက်၏။ ၎င်းသည် ယင်းအကြောင်း သတင်း အချက်အလက်ဖြစ်၏။ ဤသတင်းအချက်အလက် မရှိလျှင် ဘုရားသခင်သည် အရာခပ်သိမ်းအတွက် အသက်အရင်းအမြစ် အဘယ်သို့ ဖြစ်သည်ဆိုသည်ကို လူတို့၏သိခြင်းတွင် အပြစ်အနာအဆာနှင့် ချို့တဲ့မှုများ ရှိနေလိမ့်မည်။ သို့ဖြစ်၍ ယနေ့ကျွန်ုပ်တို့ပြောခဲ့သည့်အရာသည် ကျွန်ုပ်တို့ယခင်ပြောခဲ့သည့်အကြောင်းအရာနှင့် “ဘုရားသခင်သည် အရာခပ်သိမ်းအတွက် အသက်အရင်းအမြစ် ဖြစ်၏” တွင် ပါဝင်သည့် အကြောင်းအရာကို အဆုံးသတ်ခဲ့သည်ဟု ပြောနိုင်၏။ ဤသည်ကို နားလည်ခဲ့ပြီးနောက် ဤပါဝင်သည့် အကြောင်းအရာအားဖြင့် ယခု သင်တို့သည် ဘုရားသခင်ကို သိနိုင်ကြပြီလော။ ထို့အပြင် ထိုထက်သာ၍ အရေးကြီးသည်မှာ ယနေ့ ငါသည် အစေခံသူများနှင့်ပတ်သက်သည့် အလွန်အရေးကြီးသော သတင်းအချက်အလက်တစ်ရပ်ကို သင်တို့အား လက်ဆင့်ကမ်းခဲ့ပြီးဖြစ်၏။ သင်တို့သည် ဤကဲ့သို့သော အကြောင်းအရာများကို ကြားရခြင်းကို အလွန်ပင် ကြိုက်နှစ်သက်ကြောင်း၊ သင်တို့သည် ဤအရာများကို အမှန်တကယ်ပင် ဂရုစိုက်ကြောင်း ငါသိသည်။ ထို့ကြောင့် ယနေ့ငါပြောခဲ့သည့်အရာကို သင်တို့ကျေနပ်သည်ဟု ခံစားရသလော။ (ဟုတ်ကဲ့။ ကျွန်ုပ်တို့ ခံစားရပါသည်။) သင်တို့သည် အခြားအရာများအပေါ် ခိုင်မာသည့် ယူဆချက်တစ်ရပ် ရှိချင်မှရှိမည် ဖြစ်သော်လည်း အစေခံသူများအကြောင်း ပြောဆိုမှုများအပေါ်တွင် အထူးခိုင်မာသည့် ယူဆချက်တစ်ရပ် ရှိသည်။ အဘယ်ကြောင့်ဆိုသော် ဤအကြောင်းအရာသည် သင်တို့တစ်ဦးစီတိုင်း၏စိတ်နှလုံးကို တို့ထိ၍ဖြစ်သည်။

နှုတ်ကပတ်တော်သည် လူ့ဇာတိ၌ ပေါ်လာ၏ စာအုပ်ထဲရှိ “အတုမရှိ ဘုရားသခင်ကိုယ်တော်တိုင် (၁၀)” မှ